عادل إمام في مسرحية "شاهد مشفش حاجه،
قال للقاضي :
عارف آخر نفق العباسية؟
والقاضي رد : ايوا عارفه.
عادل إمام قاله : في محل قصب !
القاضي قاله مالو؟
عادل إمام يرد "وحِش متبئاش تشرب منه"
إيفيه عادي جدا
بس الحاجة الغريبة
إن فعلا كان في آخر نفق العباسية في محل عصير قصب بيقدم عصير سئ جدًا.
أول ما الإيفيه إنتشر كل الناس فى مصر راحت للمحل اللى حكى عنه عادل إمام عشان تجرب عصيره 'السئ' و يتأكدوا إن فعلاً سئ،
صاحب المحل في البداية إتضايق جداً وكان عايز يرفع قضية على عادل إمام،
بس إتفاجأ وقتها بكمية الزباين ... وبرغم ان الدعايه سلبيه
لكن جات بأثر عكسى ...وعملتله شهرة واسعة وغريبه.
والمحل اللي كان صغير ومحندق دا إشتهر وكِبر و بقي عنده فروع في مصر كلها
وبرضو بيقدم نفس العصير السئ
لأن أصلاً من الأساس بيشتري قصب تعبان وماحاولش يطور من نفسه،
الخدمة اللى قدمها عادل إمام
لصاحب المحل هي نفسها الخدمة نحن بنقدمها في الواقع لشخصيات زباله وتخريبية ومريضه نفسيا
شخص جرجرك فى الكلام فى قعده ... أو إتكلم فى قفاك ... وهو فى الأصل عايز ياخدك فى الحته اللى هو عايزها ...أو يهد كل اللى بنيته . تجاهله وبلاش تنساق وراه وتعمله قيمه وتعمله اللى هو عايزه ... وأنت بتهينه أوعى تفتكر إنك بتهينه ... إنت بس بترفع من شأنه .. وبتساويه بيك .. وبترفعوا جنبك .. وبتشهروا ....ورغم وساخته إنت خليته إتشهر زى محل عصير القصب اللى فى مسرحية عادل إمام
وبرضه الكلام ده بيحصل قى السوشيال ميديا بلاش تعلق لشخص هايف أو موضوع هايف إو محتوى زباله الغرض منه تعليقات واعجابات أو لفت الأنظار
حاجات ممكن بهدوء نتجاوزها لما نشوفها أو نسمعها وما نتكلمش عنها طالما اللى عملها شخص مريض نفسى أو هايف أو دلدول لحد تانى بيصفى بيه حساباته معاك
بلاش نقعد نحكى ونحش .. ونحش في الموضوع ونكبر ونوسع الحوار والجدل ... وبعدها نستغرب كيف الزبالة دا إشتهر
وبما إنك إنت جزء لا بيتجزأ من النسيج المجتمعي
حتشوف الناس بتتكلم عن الحاجة الهايفة أو المستفزه ويحاولوا يستفزوك ويجروك غصباً عنك إنك تدخل في الدوامة معاهم،
تجاوز وما تخليش الناس تشربك عصير قصب وحش من نفق العباسيه.