.
.............. يا لك من شنقيط .................
طبعا مش فاهم حاجه .... ولا أنا ... متيجى نحاول نفهم مع بعض
مانافع .. على رأى ( الخواجة محمود )........
طبعا كنت بتتسرمح بين الصفحات ومحدش بيحاسبك ...
بتدور على الترندات والبنات المايعة على التوك تك ... لحد ما
اتصدمت فجأة لقيت شاى العروسة (غلى ) ودهب العروسة برضة (غلى )
يعنى الفاتحة عشان تقراها وتقعد جنب خطيبتك لازم يكون فى جيبك
ربع مليون جنيه دى لو جوازه فقايرى ....
وطبعا اول متروح تخطب يجيبولك بدل الساقع اللى هو فى الاصل كان شربات شاى العروسة
عشان يفكروك بأن كل حاجة غليت ... ولما يتكلموا معاك على تفاصيل العفش والشبكة تبلم
وتوه وتعمل نفسك مش فاهم حاجة .... ما تيجى نسمع فيلم من افلام أبيض وأسود
................................................................................................................................
ايه رأيك فى فيلم اسماعيل يس فى الاسطول
فى الفيلم ده اللى حصل إنى
منير اللى هو "أحمد رمزى" ضرب صفارة إنذار السفينة فجأة، ... فركب رجب اللى هو
"إسماعيل يس" الهوا، ... ودلق الدهان على راس الشاويش عطية، وقرر الشاويش توقيع جزاء
على رجب، ودار بعدها حوار بين الشاويش ومنير وعبد البر"عبد المنعم إبراهيم"..
_ منير: سامحه والنبى يا شاويش عطية.
ا_ لشاويش عطية: لا ممكن اسامحه ابدا.. ابدا
_ عبد البر "بالفصحى": يا شاويش.. انت تعرف انى لا أحب إلا
الحق ولا أقول غير الحق..
_ رجب لم يتخلص نهائيا من ركوب الهواء، وعندما سمع
الصفارة نط وفط وقفز، وحدثت
الفاجعة التى لطخت وجهكم الكريم
_ الشاويش: يا جدع مابفهمش كلامك.. اسكت انت
_ عبد البر: يا لك من شنقيط.
_ الشاويش: شنقيط!!.. شنقيط يعنى إيه يا منير؟.
_ تاه منير فى سؤال الشاويش عن شنقيط وضرب لخمة،
وقال يقصد الجردل وقع منه غصب عنه.
..............................................................................................................................
وطبعا إنت أول ما تشوف المشهد ده تفضل تضحك ومفكرتش مره يعنى إيه كلمة شنقيط
لو عرفتها كنت أول ما سمعتها وقفت اجلالا ووقارا واحتراما وعرفانا لها ولأهلها
.....................................................................................................................
يا خال انت بتقول ايه
زى ما بقلك كده الكلمة دى حفظت دينك على مدار ألف عام وصححتلك كل الكتب الاسلامية
شنقيط دى بلد فى موريتانيا الاسلامية البلد دى أهلها من أذكى اهل الارض حفظا وادراكا
وذاكرتهم الصحراوية بكر يعنى مبينسوش زى حالاتك من الأندومى
اللى انت بتاكله جالك زهيمر وانت فى تالتة ابتدائى
................................................................................................................
يا عم اخلص ايه الحكاية ... إنت هتلبخ ...
الحكاية يا سيدى فى يوم من الايام ( سنة 1300هجرية ) جه واحد اسمه ( الشيخ محمود
التركزى ) عايز يطلب ( الامامة ) من الازهر فسألوه انت منين يا شيخ قال انا من موريتانيا
من بلد اسمها ( شنقيط ) وحافظ القاموس المحيط ل "الفيروز آبادي"،
المهم يا سيدى قعدوه عشان يختبروه .. فراح هو اللى اختبرهم من كثرة حفظه وفهمه لعلوم
الدين فراحوا مصحيحين جميع نسخ الازهر على حفظة و قام أيضا بتصحيح كتاب
"المخصص" ل"ابن سيده" ، و غيره من الكتب ،
فلما انتهى من تصحيحاته ،قام الامام محمد عبده
حلف ميت يمين ما يخرج من مصر حتى يقوم بمراجعة نسخ أمهات الكتب في اللغة
وعمله مرتب شهرى
الكلام ده ذكره طه حسين فى كتابه الايام
" ويذكر لنا التاريخ أيضا مقولة العلامة "ابن الحاج إبراهيم العلوي الشنقيطى
"عندما قال : "إن علوم المذاهب الأربعة لو رمي بجميع كتبها في البحر لـتـمـكـنت
أنا و تلميذي الشيخ "الديماني" من إعادتها
دون زيادة أو نقصان ، فهو يحمل المتن ....... و أنا أمسك الشروح"..
...................................................................................................................
تخيل فى البلد دى اللى هى (شنقيط ) الولد ميكملش (16 سنة) الا ويكون حفظ ألف بيت من
كل بحور الشعر ، و ستة كتب من علوم اللغة و الآداب ، و عشر كتب من المتون الفقهية ،
و شروحها ، و كتب الحديث
اما الشخص الموهوب والذكي فهو يحفظ الكتب الستة و متون المذاهب و خاصة المالكية
و شروحها و كتب الآداب و القاموس المحيط و لسان العرب ، و تلك حوالي مائة مجلد
...............................................................................................................................
الشناقطة دول ربنا حفظ بيهم الدين وعلوم القرآن فرضى االله عن أهل المغرب وخاصة
موريتانيا ورضى الله عن أهل مصر وخاصة الازهر الشريف
............................................................................................................
هذا هو الأزهر الشريف ياسادة وهؤلاء هم علماؤه من كل أصقاع الارض ، وليس كما يصوره
البعض من العلمانيين ...........انه وكر من المعممين .
ونسوا او تناسوا أنه حفظ علينا ديننا منذ الف عام ،
ولكنهم يتركون كل ذلك ويهاجمون فئة ضالة ممن ينتسبون للأزهر
يظهر مثلها في الاطباء والسياسيين والمهندسين وحتي فيهم من الملحدين
................................................................................................................
لما تتفرج على فيلم اسماعيل يس تانى أول ما تسمع كلمة ( شنقيط ) تقف على حيلك وتديه
التحية وتدعيله وتدعى لأهله وبلده ولكل من حفظ لنا ديننا وحمانا من ضلال الفهم
دمتم بخير يا سادة